استعدادات فصل الشتاء للضخامه العضليه والتخسيس .....

السلام عليكم ورحمة الله وبركاته

شخباركم يا شباب ان شاء الله تمام
صراحه في ناس كثيرين يقولون ان فصل الشتاء التمرين فيه صعب جدا للتخسيس او حتى اللياقه وهذا مفهوم خاطئ !!
انا موضوعي راح اقسمه قسمين قسم للضخامه العضليه وقسم للتخسيس واللياقه .....


أولا : الضخامه العضليه

نعرف انه في المملكه العربيه السعوديه الحر عندنا مرتفع جدا وايضا البروده مرتفعه جدا لدرجة انك تلبس الف فلينه صوف وكانك مالبست شي علشان كذا لازم تهيأ نفسك وجسمك لتقبل هذا الفصل وتخليه لصالحك .
الضخامه في لعبة كمال الاجسام تحتاج لمجهود لياقه قليل جدا لكي تحافظ على حجم العضله وتمنعها من الارهاق لكي لا تفقد الحجم العضلي الي وصلت له علشان كذا فصل الشتاء هو الفصل المناسب للضخامه لان تمرينك بيكون قوي جدا بالمقابل الجو بارد وما يخليك تنشف او تنقص حجم العضله .
نصائحي قبل التمرين : شرب السوائل الحاره مثل الشاي او القهوه او حتى الشوربات بكذا جسمك حيكون حار داخليا واول ما تروح النادي تسخين بسيط على السير والدراجه او حتى الحبل وتدخل في الفورمه على قولتهم وهذا الفصل تقدر تطور فيه نفسك وتساعد في النمو العضلي واهم شي لازم تحصل على على اقصى حد للعضله من الكفاءه اي لازم تسخن تكرارات كثيره لين توصل للحراره المطلوبه وتبدا تمرينك

بالنسبة للتغدية للضخامة
الوزن مضروب في * 3.3 = نسبة البروتينات في اليوم
الوزن * 6.6 = نسبة الكارب في اليوم
الوزن * 1 او 1.5 = نسبة الدهون المفيدة في اليوم

والشي الثاني فصل الشتاء يحتاج انك تاكل وجبات كثيره وهذا جسمك هو الي يطلبه علشان التدفئه اما فصل الصيف ما تحتاج انك تاكل كثير وتحس انك من 5 وجبات شبعت لكن الشتاء يختلف حتى في الوجبات واهم شي لاتنسى الاكل على فترات ولا تسوا زيت الزيتون ممتاز جدا في المحافظه على الحراره الداخليه للجسم.


ثانيا : التخسيس ورفع اللياقه

كثير من الناس الي امرنهم يعتقدون انه اذا ما عرق يعني انه ما تمرن صح وهذي نقطه خاطئه 100% العرق مو مقياس للمجهود الي انت بذلته المقياس الوحيد هو حركتك اثناء التدريبات وفصل الشتاء يحتاج مجهود اكبر من الصيف لبرودة الجو فبالتالي تكون مثلا في الصيف حصتين وتتعب بينما في الشتاء ممكن اربع حصص وتبي زياده وهذا يدل على انه حتى فصل الشتاء يمكن اجيب منه نتائج افضل واقوى من الفصول الثانيه
وعيب هذا الفصل اذا جا الليل تبدا تحس بالخمول والكسل بينما في النهار تكون في كامل النشاط
والتمرين في فصل الشتاء تساعد في تحسين الدوره الدمويه فبالتالي توليد المزيد من الحراره وفي نقطه مهمه الي هي قردت الجسم الدفاعيه للامراض تتحسن بشكل كبير في البرد وتزيد من قوة الجهاز المناعي للجسم ولا تنسوا الجراثيم والفيروسات تكون ضعيفه جدا نظرا لما يمر به الجسم من البروده الشديده في فصل الشتاء.
والتمرايين اللياقيه تساعد في اطلاق هرمون الاندورفين في الدماغ وهذا الهرمون هو المسؤل عن مشاعر السعاده .
ولاتنسوا ياشباب كما ذكرت سابقا فصل الشتاء يخليك تاكل اكثر للتعويض عن الحراره المفقوده وبالتالي راح يزيد وزنك علشان كذا اهم شي نظام غذائي صحي بالاضافة للتمارين وامورك تمام التمام.

وبالنسبه لقبل التمرين : اهم شي التحميه (التسخين) 10 - 20 دقيقه كافيه جدا للتسخين علشان تلين عضلاتك ولا يصبك شد او تمزقات لا سمح الله .


والحمد لله بكذا انتهيت من كتابة الموضوع
تحياتي للجميع واتمنى ان الموضوع اعجبكم ونال على رضاكم
واي استفسار ما راح نقصر وياكم
ولا تحرمونا من دعاويكم
تحياتي للجميع